NƏQLİYYAT

Rusiya şirkətlərinin dağ mədən və metallurgiya yükləri Bakı-Tbilisi-Qars yolu ilə daşınacaq
04 OKTYABR
218

Rusiya şirkətlərinin dağ mədən və metallurgiya yükləri Bakı-Tbilisi-Qars yolu ilə daşınacaq

2019-10-04 17:45:00

Azərbaycan Moskvada keçirilən “Dağ mədən və metallurgiya yüklərinin dəmir yolu ilə daşınması” adlı X Beynəlxalq konfransda təmsil olunub.

“ADY Express” MMC-dən bildirilib ki, 2 gün davam edən konfransda əsasən Rusiyanın iri dağ mədən və metallurgiya şirkətlərinin, aparıcı nəqliyyat və loqistika şirkətlərinin nümayəndələri dağ mədən və metallurgiya yüklərinin nəqli perspektivləri, həmin yüklərin axın istiqamətləri, dəmir yolu ilə onların effektiv daşınması yolları və digər aktual məsələləri müzakirə ediblər.

Tədbirdə iştirak edən “ADY Express” MMC-nin nümayəndələri tərəfindən həmin növ yüklərin Rusiyadan cənub-qərb istiqamətində nəqli məsələləri təqdim olunub. Azərbaycan Dəmir Yollarının, Bakı-Tbilisi-Qars dəmir yolu kimi iri infrastruktur layihələrinin imkanlarını konfrans iştirakçılarının diqqətinə çatdıran şirkət nümayəndələri Türkiyə və digər ölkələrə bu növ yüklərin daşınmasında Azərbaycan ərazisindən keçən tranzit marşrutlarının üstünlüklərini nümayiş etdiriblər. Bildirilib ki, Bakı-Tbilisi-Qars dəmir yolunun imkanları ənənəvi marşrutlardan daha əlverişlidir. Azərbaycan ərazisindən keçən dəmir yolu marşrutu nəqliyyat növünü dəyişmədən yüklərin Bakı-Tbilisi-Qars dəmir yolu vasitəsilə daha tez və əlverişli şərtlərlə ünvana çatdırılmasına imkan yaradır.

Yüklərin həm Türkiyəyə, həm də Türkiyənin Aralıq dənizindəki limanlar vasitəsilə digər ölkələrə daşınmasının həlli yollarını təklif edən “ADY Express” iri yük sahiblərinə, yeni logistik məhsul sərgiləyib.

Konfrans çərçivəsində Rusiyanın iri istehsalçıları ilə ikitərəfli görüşlər keçirən “ADY Express” nümayəndələri artıq Bakı-Tbilisi-Qars dəmir yolu ilə dağ mədən və metallurgiya yüklərinin daşınmasına dair sifarişlər alıblar. Yaxın zamanlarda həmin yüklərin nəqlinə başlanılacaq.

© Materiallardan istifadə edərkən hiperlinklə istinad olunmalıdır