NƏQLİYYAT

Bakı avtovağzalından 3 ayda 1 milyondan çox sərnişin daşınıb
04 SENTYABR
76

Bakı avtovağzalından 3 ayda 1 milyondan çox sərnişin daşınıb

2019-09-04 13:44:00

Yay aylarında Bakı Beynəlxalq Avtovağzal kompleksində şəhərlərarası və beynəlxalq istiqamətlərə sərnişin sayında artım müşahidə olunub.

Fins.az xəbər verir ki, bunu Bakı Beynəlxalq Avtovağzal Kompleksinin (BBAK) mətbuat xidmətinin rəhbəri Pərvin Məmmədova deyib.

Onun sözlərinə görə, üç ay ərzində 1 milyondan çox sərnişinin avtovağzaldan gedişi təmin olunub: "Son 3 ay ərzində (iyun, iyul, avqust) BBAK 38 089 reys həyata keçirib. Bu reyslər üzrə 1 milyon 14 min 748 sərnişin daşınıb. Bunlardan 92 min 916 nəfəri İstanbul, Marneuli, Tbilisi və Batumi şəhərləri istiqamətlərinə yola düşən sərnişinlərin payına düşüb. Qalanları isə Gəncə, Qırmızı Körpü, Quba, Mingəçevir, Qusar, Şəki şəhərlərinə səfər edənlər üstünlük təşkil edib".

P.Məmmədova sərnişinlərə xatırladıb ki, mövsümlə əlaqədar Batumi istiqamətində sonuncu reys sentyabrın 4-də yola düşəcək.

Qeyd edək ki, biletləri BBAK-ın kassalarından gündəlik və ya səfər tarixinə 10 (on) gün qalmışdan 1 (bir) gün öncəyədək əldə etmək mümkündür. “Onlayn” qaydada bilet almaq istəyən sərnişinlər avtovagzal.az saytı üzərindən və ya mobil tətbiq vasitəsilə biletlərini təmin edə bilərlər.

Bakı Beynəlxalq Avtovağzalı yalnız avtovağzal ərazisindən fəaliyyət göstərən avtobuslara nəzarət edir. Qeyri-qanuni sərnişindaşıma ilə bağlı yarana biləcək hər hansı bir hadisəyə BBAK cavabdehlik daşımır.

© Materiallardan istifadə edərkən hiperlinklə istinad olunmalıdır