BANK

“Ziraat Bank Azərbaycan” -ın əməliyyat mənfəəti azalıb
09 OKTYABR
88

“Ziraat Bank Azərbaycan” -ın əməliyyat mənfəəti azalıb

2019-10-09 14:48:00

“Ziraat Bank Azərbaycan” ASC 2019-cu ilin yanvar-sentyabr (9 ay) dövrünü 3 milyon 8 min manat xalis mənfəət ilə başa vurub. Bank ötən ilin eyni dövrünü 1 milyon 604 min manat xalis mənfəət ilə bağlamışdı. Beləliklə, “Ziraat Bank Azərbaycan”ın xalis mənfəəti təxminən 1,9 dəfə artıb. Xalis mənfəətin artması ehtimal olunan kredit və depozit itkiləri üçün ehtiyata ayırmanın azalmasından qaynaqlanıb. Bankın məhsuldarlığını daha düzgün əks etdirən əməliyyat mənfəəti xərclərin artması ilə əlaqədar olaraq azalıb. 

Fins.az  Bankın rüblük hesabatlarına istinadən xəbər verir ki, 2019-cu ilin yanvar-sentyabr dövründə “Ziraat Bank Azərbaycan” ASC-nin cəmi gəlirləri (faiz və qeyri-faiz) 15 milyon 780 min manat, cəmi xərcləri (faiz və qeyri-faiz) isə 11 milyon 842 min manat təşkil edib. Bank 3 milyon 938 min manat əməliyyat mənfəətinin 843 min manatını aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb və 86 min manat mənfəət vergisi ödəyib.

Müqayisə üçün qeyd edək ki, 2018-ci ilin yanvar-sentyabr dövründə “Ziraat Bank Azərbaycan” ASC-nin cəmi gəlirləri 13 milyon 63 min manat, cəmi xərcləri  8 milyon 705 min manat, əməliyyat mənfəəti 4 milyon 358 min manat təşkil etmişdi. Bank əməliyyat mənfəətinin 2 milyon 516 min manatını ehtiyatın yaradılmasına ayırdığından və 237 min manat mənfəət vergisi ödədiyindən mənfəəti 1 milyon 604 min manata düşmüşdü.

Göründüyü kimi, ötən ilin 9 ayında “Ziraat Bank Azərbaycan”ın əməliyyat mənfəəti 4 milyon 358 min manat ikən, 2019-cu ilin eyni dövründə 3 milyon 938 min manata düşüb. Səbəb xərclərin gəlirlərdən daha çox artmasıdır.

“Ziraat Bank Azərbaycan” ASC-nin faiz gəlirləri ötən ilin 9 ayında 9 milyon 596 min manat ikən, cari ilin 9 ayında 13 milyon 18 min manat təşkil edib. Qeyri-faiz gəlirləri isə 3 milyon 468 min manatdan 2 milyon 761 min manata düşüb.

“Ziraat Bank Azərbaycan” ASC-nin faiz xərcləri ötən ilin 9 ayında 3 milyon 170 min manat ikən cari ilin 9 ayında 3 milyon 530 min manat təşkil edib. Qeyri - faiz xərcləri isə 5 milyon 535 min manatdan 5 milyon 968 min manata yüksəlib.

30 Sentyabr 2019-cu il tarixində “Ziraat Bank Azərbaycan”da müştərilərə verilən kreditlər 130 milyon 593 min manat təşkil edib. 2018-ci ilin sonunda bu rəqəm 105 milyon 488 min manat idi. Beləliklə, 9 ay ərzində Bankımn kredit portfeli 25 milyon 105 min manat və ya 23,8% artıb.

9 ay ərzində Bankın cəmi aktivləri isə cüzi azalaraq  227 milyon 918 min manatdan 227  milyon 811 min manata geriləyib. Azalma Mərkəzi Bankda müxbir hesabın və  "Nostro" hesabların (başqa banklardakı müxbir hesabları) düşməsilə əlaqədardır.

30 Sentyabr 2019-cu il tarixində "Ziraat Bank Azərbaycan" 67 milyon 535 min manat məcmu kapitala malik olub.

“Ziraat Bank Azərbaycan” ASC-nin səhmdarları "T.C.Ziraat Bankası Anonim Şirkəti" (99.98%), "Ziraat Sigorta Anonim Şirkəti" (0.01%)  və "Ziraat Yatırım Menkul Değerler Anonim Şirkəti"dir (0.01%).

 
© Materiallardan istifadə edərkən hiperlinklə istinad olunmalıdır